വിവാഹേതരബന്ധം

ആറാം ക്ലാസിൽ പഠിക്കുന്ന മോള്, വിവാഹേതരബന്ധം ന്ന് വെച്ചാൽ എന്താണെന്ന് അടുക്കളയിൽ വച്ച് ചോദിക്കുന്നത് വെളിയിലിരിക്കുന്ന ഞാൻ കേട്ടു. നിന്റെ അച്ഛനോടു ചോദിക്കുന്നതാവും കുറെ കൂടി നല്ലതെന്ന് അവളുടെ അമ്മ കനപ്പിച്ച് പറയുന്നതും കേട്ടു.. എനിക്ക് ഓടി രക്ഷപ്പെടാൻ സമയം കിട്ടിയില്ല. മോള് മുന്നിലെത്തി. എന്ത് സംശയമുണ്ടെങ്കിലും എന്നോടു ചോദിക്കാൻ മടിക്കേണ്ടെന്ന് ഞാൻ പലപ്പോഴും മോളോട് പറയാറുള്ളത് കുഴപ്പമായി. വിവാഹേതര ബന്ധം ന്ന് പറഞ്ഞാ എന്താണ്? ഫോർ എക്സാംപിൾ, അച്ഛൻ വീട്ടിൽ ഇല്ലാത്ത സമയത്ത് വീട്ടിൽ അമ്മയോടൊപ്പം വേറൊരാൾ അടുപ്പം കാണിക്കുന്നു എന്നു വിചാരിക്കുക. പറഞ്ഞ് തീർന്നില്ല, ഓന്റെ കയ്യും കാലും ഞാൻ തല്ലി പൊളിക്കും! മോള് പെട്ടെന്ന് പറഞ്ഞു. അതേക്കാൾ ഞെട്ടിക്കുന്ന ശബ്ദത്തിൽ അടുക്കളയിൽ നിന്നും പത്രം തറയിൽ വീഴുന്ന ഒച്ച കേട്ടു . ഫോർ എക്സാംപിൾ ശരിയായില്ലാന്നാ തോന്നുന്നത്! കുട്ടിക്ക് എളുപ്പം മനസിലാവാൻ പറഞ്ഞതാ.. മനോരമയും മാതൃഭൂമിയും വലിയ തലക്കെട്ട് കൊടുത്ത് വാർത്ത എഴുതിവിടുമ്പോ, കുട്ടികളോട് കാര്യങ്ങൾ വിശദീകരിക്കാനുള്ള അച്ഛന്മാരുടെ പ്രയാസങ്ങൾ ആരും കാണുന്നില്ല! ഫോർ എക്സാംപിൾ കാരണം കുട്ടിയുടെ അമ്മയും ഏതാണ്ട് യുദ്ധത്തിന് തയ്യാറായി നിൽക്കുകയാണ്. september 28, 2018